USAID се рӯзноманигори ғолиби тоҷикро қадрдонӣ кард

Иқтисод 01.10.2018 13:37

Дар озмуни "Замини зархез"-и барномаи USAID, ки барои аҳли матбуоти Тоҷикистон эълон шуда буд, се хабарнигори тоҷик - Одили Нозир аз ҳафтаномаи "Тоҷикистон", Низомиддин Исоев - хабарнигор аз вилояти Хатлон ва Суҳроби Зиё, хабанигори Би-Би-Сӣ пирӯз шуданд.

Лоиҳаи кишоварзӣ ва обёрии USAID дар доираи ташаббуси "Озуқаворӣ ба хотири оянда" озмуни "Замини зархез"- ро барои намояндагони ВАО эълон карда буд. Ин озмун 28 сентябр ҷамъбаст шуд.

Ба озмун беш аз 20 матлаб пешниҳод шуд, ки 5 довар онҳоро баҳогузорӣ карданд. Дар натиҷаи ҷамъбасти овозҳо дар бахши матолиби чопӣ Одили Нозир, дар бахши радио ва мултимедиа Низомиддин Исоев ва дар бахши матолиби тасвирӣ Суҳроби Зиё сазовори ҷойҳои аввал шуданд. Тибқи муқаррароти озмун ба ғолибон туҳфаҳои боарзиш ва диплом тақдим шуд.

Суҳроби Зиё, таҳиякунанда ва хабарнигори Телевизиони форсии Би-би-Сӣ дар Тоҷикистон ва яке аз барандагони озмуни “Замини зархез” дар бораи таасуроташ аз ин озмун мегӯяд:

“Баргузории чунин озмунҳо муҳим аст, зеро расонаҳо ва хабарнигоронро ба инъикоси мушкилоти арсаи кишоварзӣ ва обёрӣ дар Тоҷикистон бештар алоқаманд мекунад. Кишоварзӣ аз муҳимтарин бахшҳои иқтисоди Тоҷикистон мебошад ва аз назари захоири обӣ ҳам кишвар нисбат ба ҳамсоягонаш дар вазъияти беҳтаре қарор дорад. Аммо дар заминаҳои истифодаи сарфаҷӯёна аз об, мудирияти муассири захираҳои обӣ ва истифода аз технологияҳои нав дар обёрии киштзорҳо монеъаву мушкилот ҳанӯз хеле зиёд аст. Бояд расонаҳо ва мо, хабарнигорон мушкилоти кишоварзони тоҷикро бештар бозтоб бидиҳем, дар ҳаллу фасли онҳо саҳми худро гузорем ва агар онҳо дастоварде доранд, онро низ набояд нодида бигирем. Зеро рангинии суфраи ҳар хонаводаи кишвар аз заҳмати кишоварзон вобаста аст ва ҳамкорию кумак ба онҳо метавонад ба манфиати иқтисоди ҳар хонавода бошад. Аз ин дидгоҳ озмуни баргузоркардаи тарҳи "Кишоварзӣ ва обёрӣ дар доираи ташаббуси озуқаворӣ ба хотири оянда", ки барномаи USAID дар Тоҷикистон онро иҷро мекунад, барои инъикоси ин масоил муҳим ва саривақтӣ аст ”.

Дар маросими ҷамъбасти озмуни “Замини зархез” масъулон ва хабарнигорони расонаҳои маъруфи кишвар иштирок доштанд.

Дар ҷараёни озмун Сурендра Баҳатта, роҳбари бахши рушди иқтисодӣ дар USAID ва Сабоҳатулло Музаффаров, муовини роҳбари лоиҳа барои ҳозирин доир ба дастовардҳои лоиҳа итилоъ доданд.

©2008 - 2018 "Миллат" - рӯзномаи ҷамъиятӣ сиёсии Тоҷикистон. All right reserved.

Нишонӣ: Ҷумҳурии Тоҷикистон, шаҳри Душанбе, хиёбони С. Шерозӣ 16 ошёнаи 2
E-mail: info@millat.tj, millat@inbox.ru Tel: (+992)37-88-111-97