Ба ин тартиб, талоши додгоҳ барои оштӣ додани ду ҷониб бенатиҷа анҷом ёфт ва ҳамакнун муҳокимаи шикояти Тураҷонзодаҳо алайҳи Сайидмукаррам Абдулқодирзода, раиси Шӯрои уламо, идома хоҳад ёфт.

Қарор буд дар лаҳзаҳои интишори ҳафтанома, 8 феврал ҷаласаи навбатии додгоҳии Тураҷонзодаҳо бо Шӯрои уламо шӯруъ шавад.

Ба гуфтаи ҷаноби Ҳоҷӣ Акбар Тураҷонзода Шӯрои уламо ба далели гирди ҳам наомадани аъзои ин шӯро ба қарори қатъӣ нарасидааст, ки бо ин хонадон сулҳ хоҳад кард ва ё хайр. Аммо дар ҳамин ҳол Саидмукаррам Абдулқодирзода, раиси Шӯрои уламои Тоҷикистон зимни ҷаласаи машваратӣ дар додгоҳ гуфтааст, ки "шахсан ба сулҳ кардан розӣ аст, аммо аъзои дигари шӯро ҳозир нестанд қарори худро иваз кунанд".

Зимнан рӯзи душанбеи 6 феврал ҷаласаи додгоҳии эшон дар Суди ноҳияи Исмоили Сомонии пойтахт доир шуд.

Дар ҷаласаи аввали додгоҳии хонаводаи Тураҷонзодаҳо бо раиси Шӯрои уламо Саидмукаррам Абдулқодирзода дар 26 январ судяи парванда ба ҷонибҳо пешниҳод карда буд, то ба сулҳ бирасанд. Тураҷонзодаҳо эълон доштанд, ки сулҳро мепазиранд, аммо бар ивази 3 шарт: Нахуст бекор кардани қарори Кумитаи дин дар бораи бастани масҷиди "Муҳаммадия", дуввум бекор кардани Баёнияи "туҳматбарангези" Шӯрои уламои кишвар, ки хонаводаи Турҷонзодаҳоро ба шиагароӣ мутаҳҳам мекард ва севвум баргузор кардани ҷаласаи дигари Шӯрои уламо ва даъват кардани ин хонавода ба ин ҷаласа.

Дар ҷаласаи аввали додгоҳӣ ҷаноби Абдулқодирзода низ эълон дошт, ки моил аст, шартҳои Тураҷонзодаҳоро ба баррасӣ бигирад ва дар мавриди сулҳ бастан низ бо аъзои дигари Шӯро машварат кунад.

Аммо Саидмукаррам Абдулқодирзода, раиси Шӯрои уламо мисли ҷаласаи қаблии додгоҳӣ ин бор ҳам аз шарҳи назароти худ дар ҳузури рӯзноманигорон худдорӣ кард ва танҳо гуфт, ки ҳама чиз хуб аст.

Ёдовар мешавем, баҳси хонаводаи Тураҷонзодаҳо, аз маъруфтарин хонаводаи рӯҳонии кишвар дар авоили моҳи декабри соли гузашта шӯруъ гардид. Шӯрои уламои кишвар бо паҳн кардани як баёния ин хонаводаро шиагаро унвон кард ва ҳам Кумитаи дини кишвар бо як қарор дар асоси қонунҳои Тоҷикистон фаъолияти масҷиди "Муҳаммадия"-и мутааллиқ ба хонаводаи Тураҷонзодаҳоро дар ноҳияи Ваҳдат барои 3 моҳ мутаваққиф сохт.

Нахуст Шӯрои уламо ҳамроҳ бо Кумитаи дин ва Раиси шаҳри Ваҳдат Анвари Вайсиддин ба додгоҳи шаҳри Ваҳдат аллайҳи Тураҷонзодаҳо шикоят бурданд. Ва додгоҳи шаҳри Ваҳдат ҳам Ҳоҷӣ Акбар Тураҷонзода ва Нуриддин Тураҷонзодаро дар таҳқири раиси Шӯрои уламо муҷрим шинохта, ҳар якеро ба 350 сомонии пардохти ҷарима водор карда буд.

Ин бор Тураҷонзодаҳо аллайҳи раиси Шӯрои уламо ба додгоҳ муроҷиат карданд. Тураҷонзодаҳо даъво доранд, ки қарори Шӯрои уламо ҷаълӣ ё сохта буда, аксари аъзои ин Шӯро ба ҳангоми қабули Баёнияи мазкур ширкат надоштаанд.

Бо ин вуҷуд, феълан масҷиди Тураҷонзодаҳо баста аст ва эшон талош доранд қабл аз ба итмом расидани фурсати 3 моҳа масҷиди худро боз бубинанд.

Ёқуби Саид