Бонкҳои Тоҷикистон барои анҷоми муомилот бо доллар маъмулан дар CITI - бонки Амрико суратҳисоб боз карда буданд, ки ахиран ин суратҳисобҳо масдуд шудаанд.

Аммо оё масдуд шудани суратҳисобҳои бонкҳои Тоҷикистон дар CITI-бонки Амрико ба мавзӯъи таҳримҳо алайҳи Эрон рабте дорад?

Маркази матуботи Бонки миллии Тоҷикистон ба хабаргузориҳо баста шудани суратҳисобҳоро таъйид карда, сару садоҳо дар мавриди таҳти таҳрим қарор гирифтани бонкҳои Тоҷикистонро бепоя хондааст. Ин манбаъ иттилоъ додааст, ки воқеъан ҳисобҳои бонкии бархе аз Бонкҳои Тоҷикистон, ки дар CITI-бонки Амрико воқеъ будаанд, баста шудааст, аммо ин амр танҳо ба вазъи молии худи CITI-бонки Амрико бастагӣ дорад.

Гуфта мешавад, ба ҷуз аз суратҳисобҳои бонкҳои Тоҷикистон боз ҳисобҳои бонкҳои бархе аз кишварҳои дигари ҷаҳон дар ин бонки Амрикоӣ масдуд шудаанд.

Ҳадс зада мешвад, ки CITI-бонки Амрико маъмулан бо бонкҳои кишварҳое ҳамкориро қатъ кардааст, ки муомилоти молиашон чандон бузург набудааст.

Ба гуфтаи намояндаи Бонки миллии Тоҷикистон, ин амр дар фаъолияти бонкии кишвар мушкиле эҷод нахоҳад кард, зеро бонкҳо тасмим гирифтаанд, ба зудӣ дар бонкҳои дигари Амрико суратҳисобҳои худро боз карда ва аз ин роҳ муомилоти молӣ тавассути долларро идома диҳанд.

Аммо як ҳафта пас аз пахши ин хабар, Бонки миллии Тоҷикистон дар мавриди боз намудани суратҳисобҳои ҷадид дар дигар бонкҳои Амрико изҳори беиттилоӣ мекунад.

Бо ин ки аз масдуд шудани суратҳисобҳои бонкии Тоҷикистон дар Амрико як ҳафта сипарӣ мешавад, як масъули Маркази матбуотии Бонки миллии Тоҷикистон дар сӯҳбат бо "Миллат" гуфт, дар Амрико шумори бонкҳо хеле зиёд аст ва боз намудани суратҳисоб ҳеҷ мушкилие надорад. Аммо Бонки миллии Тоҷикистон дар мавриди боз намудани суратҳисобҳои ҷадид дар дигар бонкҳои Амрико изҳори беиттилоӣ мекунад.